GEGURITAN SD Muhammadiyah Purbayan Kotagede

SD Muhammadiyah Purbayan Kotagede

Geguritan SD Muhammadiyah Purbayan Kotagede

Geguritan

Geguritan SD Muhammadiyah Purbayan Kotagede 

Geguritan

28 Februari 2012

Program Geguritan hari selasa, 28 Februari 2012 menampilkan  siswa-siswa SD Muhammadiyah Purbayan Kotagede. Walaupun masih duduk di tingkat SD namun para siswa ini sudah berani tampil mengekspresikan bakat seninya. Pada kesempatan tersebut dibacakan sepuluh gurit yang merupakan karya dari sembilan panggurit. Judul geguritan tersebut antaralain,

1. Damaring Jagad Karya Mas Gampang Prawoto, dibacakan oleh Malinda Ayu Kusumanungki
2. Dosa omong dosa meneng karya AY Untung Rus Bintarto dibacakan oleh Erika Nur Rahmawati 
3. Jatining Konang, karya T. Wagimin dibacakan oleh Destiawatara  Saraswati Pratiwi
4. Asung Pepeling, karya Dewi Dersanala, dibacakan oleh Dinta Maulidya Kalandara
5. Cecaturan Marang Wengi, karya Gayuh R.Saputra, dibacakan oleh Yessi Amalia Rahmawati 
6. Kedhung Atiku, karya Eny MS, dibacakan oleh Dhinta Mulidya Kalandara 
7. Suling Bambu Runcing, karya Djaimin K, dibacakan oleh Helmi Nur.Azhar
8. Tuwuhing Tetanduran Wewangi Pamuji Sawiji, karya Joko Susilo, dibacakan oleh Wulan Nurul Fatika
9. Aku Pasrah, karya Ardini Pangastuti,BN, dibacakan oleh Fatika Amaliya Rahmah
10. Kembang Mawar Mawa Ri, karya AY Untung Rus Bintarto, dibacakan oleh Anisa Indah Saputri

Berikut beberapa pethikan karya gurit yang dibacakan oleh siswa :

Geguritan 

Damaring Jagad

Anggitanipun : Mas Gampang Prawoto

ngger......sadawane tipak  rodha cikar, 

mesthi ngetut lacak lakune sapi

ngger damar,  sadawane pager yen saka ijone tanduran

bakal disenggut kewan ucul saka kawaran

ngger damar, sing ngati- ati,   

iki dudu wedang teh,  ning whisky

iki dudu permen blis,  ning ekstasy, 

lamun banyu segara munggah darat iku tsunami

aja lali, esuk sekolah sore ngaji.   

sangu urip celengan mati.

ngger damar,aja kliru, 

iku dudu petis, ning candu,

iku dudu gulawatu, ning sabusabu

lamun bumi horeg, lemah bengkah, iku lindhu,  

aja lali..sregep sinau ora tau ora mlebu,  

mituhu dhawuhe guru lan ngabekti bapa lan ibu

ngger damar waspadakna,  

iku dudu godhong wijen, ning  ganja,  

iku dudu glepung tempe,  ning mariyuana.  

lamun srengenge lan bulan rerangkulan iku grahana.

aja lali,  lakune urip- uga uripe laku lakonana 

sabar, sareh, sumeleh, nrima osike kang maha kuwasa.

damar, damar, damaring jagad, urip lan nguripi,  milah lan milih paugeraning,

 urip  kang  jati.

Dosa Omong Dosa Meneng

Anggitanipun :  Ay Untung Rus Bintarto

omong iku tembung kedaling lesan,   muna-muni obahing lidhah lan lathi

mangka wahyaning ati,  ati tulus resik murni ,  mbabar tembung manuhara

ulat manis laku utama,   akarya enaking nala

kosok baline,  ati reged kebak dosa,  mbabar tembung kasar,  swara sugal

nyekrok , nylekit, gawe serik lara ati,   iku klebu ewoning dosa omong

dosa meneng ....iki bisa dumadi,  lamun kita  krungu  lan nyipati,  ubyur gotheking tembung  panyatur alaning wong liya,  ing kahanan  iki kita kudu wani nyaruwe

elik elik  iku ora prayoga,  tundhone bakal nuwuhake gendra

eling wong dhemen ngrasani pindhane ula,  ilat cawang loro, cangkem mawa wisa

iki yekti mbebayani,  malah ujaring kandha : ‘kedaling tembung ala iku luwih landep katimbang tajeming pedhang “.  mula elik elika yen ana wong nyatur ala, aja amung

meneng kewala, iku klebu “dosa meneng”  saora orane “ ana catur mungkur “

Jatining Konang

Anggitanipun : T. Wagimin.

puluhan taun konang wus padha ngilang,  konang kang kinarya pepadhang

saiki wus datan sinawang, menyang ngendi lungamu konang ?

apa iki kang jeneng pralambang ?

aku wus kangen marang karyamu,  kang sayekti tulusing kalbu

weh  pepadhang ing wanci dalu,  marang janma kang kepetengan laku

aku butuh pepadhangmu

jaman saiki jaman mutakir,  padha ngagungake dayaning pikir

numpuk donya tan wruh ing jaman akhir,  srana sakeh prekara padha diplintir

yen kepengkok ndadak isih mukir,  sanajan tan wurung jinaga sang sipir

oh konang...... aku getun kedhuwung,  wit  tan   maelu pituduh mungguh

kang tinandur telenging sanubari,  awujut ati nurani

konang paring dalem gusti,   ya jatining konang.

Asung Pepeling

Anggitanipun  : Dewi Dersanala.

ujaring paniti sastra asung pepeling,  lamun sira darbe penggayuh

aywa wedi marang teteki,  narima ing samubarang karsa

gung mestuti darmaning sedya

tuhu iku laku utama,  amerangi tindak culika, 

haywa kongsi darbe watak ngamandaka

undheraning bakal nemahi cilaka,  nadyan den tamengi waja

poma den emut piweling jati, eman yen ta ngantos katalompen,  raharja ing sedya mulya,   kinarya amestuti salwiring karya,    ambuka wiwaraning marga

wecaning brahmana yekti,  ing samangkya dadya  pepeling,   nalisir bakale kejungkir  angluhurna asmaning pangeran,  netepi dharmaning kautaman

kukuh mamayu hayuning bawana,  mligine jalma ing alam  pada.

Cecaturan Marang Wengi

Anggitanipun :  Gayuh  R. Saputra

wengi iki dak ukir,  rasa kapang marang lintang,  saka ati punjering katresnan

ngronce tetembungan marang rembulan

wengi iki dak kidungake, tembang asmarandana,  kanthi kairing swara gamelan laras slendro,  ngrantu tekaning penganten anyar

wengi iki dak gambarake, wujuding wewayanganmu, saka pangkoning lintang wengi

bakal dak pandeng sajroning pengangen angen

wengi iki rembulan ndadari,  nyekseni anggon kucecaturan marang

panguwasa wengi nyuntak pangrasa kang isih durung wedhar, 

marang putri prameswari

Kedhung Atiku

Anggitanipun  : Eny Ms

ing jero atiku ana mbulan,  endah rinengga mega putih arak arakan

yen sliramu pengin nglukis ing kanvasmu,   sawangen kang permati nganggo atimu

ing jero atiku ana srengenge,  sing tansah madhangi lakuku saben dinane, yen sliramu ngersakake cahyane,  jupuken nganggo tuluse asihmu ora mung gawe gawe

ing jero atiku uga ana kedhung, papan kanggo kungkum yen –pikir lagi bingung

ya gene  ngerti- ngerti ana ati sing kecemplung........?

Suling Bambu Runcing

Anggitanipun :  Djaimin. K.

jaman lara lapa,   iki bambu runcing anyuwara nyaring,   merdeka  atau  mati

iki dina bambu runcing  ginawe suling,  ing pangangkah lamun  sinebul  dhimen ngambali anyuwara  nyaring,   nanging ya gene swarane loyo ?  tan cumengkling, 

agawe  mrinding ?   tan kuwawa  nggugah ati,     mbok menawa  kaperbawan jaman kang sarwa lelamisan,   menceng adoh,  esthining pangimpen, anggayuh dina kalis papa cintraka,  medhaki pertiwi kanthi wangi kesturi

suling tengkeran bambu runcing,  tak  ajab bali gumregah anyuwara nyaring

dhimen sakehing  reretu lumayu nggendring

Tuwuhing Tetanduran Wewangi Pamuji Sawiji

Anggitanipun  : Joko Susilo

pancen tak sengaja nandur mega ing padharanmu, dak anti ron pakis aji tuwuh saka garbamu, uga dak sengaja dak tinggal rikmamu ing dhasaring pasareyan,

dak perang dadi telu,  dudu gelu ananging ron sekar arum dalu.

aja leren,  anggonmu najemke netra,  karana padmamu teka ing wates wangine

kaloron ron,  kang wus sinebut suluh,  muga medhar tinandur katur sulur piranti

bumi ,  pinangka piwedhar,  serat saka suburing bawana

kang kapisan oyot,  kang kapindho  wit,  kang katelu carang, kang pungkasan ron

ron dudu piwelas kang kapat,  ananging iku suling gadhing,  trus munggah sasirah

tumekan mega, tanpa asta, ananging bisa ngasta wangsul peteng dhedheting mega

carang tan gumarang,  trus nembang, sarempang slendhang kuning, pramila tanah

pasarean tansah ngripta gendhing,  mendhung mung langkung.

wit pinangka wot,  wewangining arum dalu,  satuhu saka saserah mring grana tanpa lara,  lelaku sarujuk sakarep endhaning  mega

oyot kang kapisan,  sanajan jero, ananging terus nyandhing mega, dudu weweden,

iku tekaning pati,  sakabehing tuwuh tetanduran wewangi pamuji sawiji.

Aku Pasrah

Anggitanipun : Ardini Pangastuti, BN

mangsa tansah gilir gumanti,  wis tak cecep sakabehe  rasa panguripan

liwat gelaran lakon,  sing kadhang gawe komete pikir lan nelangsane ati

nanging uga isih   kerep tak temu, rasa bagya mulya,  nyunari kalbu,  mahanani jangkah krasa entheng, najan kudu nasaki bebondhotan urip sing ora karuhan

ing pungkasane aku mung bisa pasrah,  merga,  utegku ora gaduk mikirake apa kersa  mu, apa rencana  mu,  ing suwalike reroncen lakon

sing kudu tak ayahi lan uga tak ayati

Kembang Mawar Mawa  Ri

Anggitanipun :  Ay Untung Rus Bintarto

kembang mawar yen cinadra,  makutha silih rupa neka warna

abang, putih, biru, kuning, jingga  yekti agawe reseping nala

mawar yen ta nedheng mekar, mbabar ganda ngambar ambar, bremara mara ngisep

sarining sekar, wiwit pletheking surya, tumeka lingsiring sunar

eman.... gagang mawa ri,  lancip tajem mutawatiri, sapa tan weka nggrayang gagang, tangan tatu gubras getih,  angluh sambat rasa perih

yen ginoyang goyang kombang,  makutha gampang rontog  tumiba lemah

nanging kombang kudu dahat ngati ati,  tan tatu tajeming  ri

yekti  ri  iku ngayomi,  dimen makutha tetep katon asri,  endah sinawang, ngresepake ati.  sumurupa !   iki karya dalem gusti.